Rádjeavádat lea merkejuvvon eanadahkii
Rádjeavádaga duohkerádji lea merkejuvvon eanadahkii fiskes rádjeavádattávvaliiguin, muoraide ja stoalppuide málejuvvon dahje giddejuvvon fiskes rieggáiguin, dahje geainnuide ja johtolatbálgáide biddjon bummiiguin. Čázádagain mearkan geavahit fiskes galbbaid, boijaid ja loddetávvalbáraid.
Rádjeavádat lea dárkileappot meroštallojuvvon Stáhtaráđi ásahusas rádjeavádagas ja rádjeavádaga duohkerájás.
Gii sáhttá oažžut rádjeavádatlobi?
Rádjegozáhuslágádus mieđiha rádjeavádatlobi, jus dasa lea ássama, barggu, ámmáha, ealáhusa, fidnošeami dahje áigeáji dihte dohkálaš sivva iige lobi mieđiheamis čuožžil earenoamáš várra rádjeortnega dahje rádjedorvvolašvuođa bajásdoallamii.
Earenoamážit áigeádjedoibmii laktáseaddji lohpeohcamiin ferte ákkastallat, manin doaibma galgá dáhpáhuvvat juste rádjeavádagas.
Ná ozat rádjeavádatlobi
- Oza lobi elektrovnnalaš bálvalusas, mii stivre ohcamuša rivttes gozáhussii mearrideami várás. Sáhtát čálihit sisa bálvalussii sihkkarastinkoarttain dahje neahttabáŋkodovddaldagaiguin.
- Jus it sáhte dikšut ášši áššehasbálvalusas, sáhtát maiddái buktit ohcamuša ieš dahje doaimmahit dan poastta, kurira, áššeolbmo dahje veahkeheaddji bokte guovllu gozáhusa njunušgoddái dahje rádjegozáhusstašuvdnii. Doaimmat ohcamuša gozáhussii, man doaibmaguovllu dat eanaš guoská.
- Ovdanbuvtte ohcamušas čilgehusa iežat identitehtas, oktavuođadieđuin ja ákkain lobi juolludeapmái. Lohpeášši meannudeapmi lea nuvttá.
- Jus leat ohcan lobi elektrovnnalaččat, oaččut mearrádusa Suomi.fi bálvalusas. Sáhtát viežžat bábermearrádusa vuosttažettiin Rádjegozáhuslágádusa doaibmasajis.
RÁDJEGOZÁHUSLÁGÁDUS RÁDJEAVÁDATLOHPEOHCAMUŠ (PDF)
Gii gieđahallá mu ohcamuša?
- Lappi rádjegozáhus meannuda Anára, Salla, Suovvaguoikka ja Soađegili guoski ohcamušaid.
- Kainuu rádjegozáhus meannuda Kuhmo, Guossáma ja Suomussalmi guoski ohcamušaid.
- Davvi-Gárjila rádjegozáhus meannuda Ilomantsi, Joensuu, Kitee, Lieksa, Tohmajärvi ja Parikkala gieldda Pyhäjärvi čáhceguovllu guoski ohcamušaid.
- Nuortalulli-Suoma rádjegozáhus meannuda Imatra, Lappeenranta, Miehikkälä, Parikkala (earret Parikkala gieldda guovllus Pyhäjärvi čáhceguovlu), Rautjärvi ja Ruokolahti sihke Virolahti eatnanguovllu guoski ohcamušaid.
- Suomaluovtta mearragozáhus meannuda Hamina, Kotka ja Virolahti mearraguovllu guoski ohcamušaid.
Geahča oktavuođadieđuid: Oktavuohtadieđut
Rádjeavádatlobi bistu
Rádjeavádatlohpi lea juogo doaisttážii gustojeaddji dahje mearreáigásaš. Sáhtát oažžut doaisttážii gustojeaddji lobi, jus orut rádjeavádagas, hálddašat rádjeavádagas ássanviesu dahje giddodaga dahje barggat rádjeavádagas fásta.
Mearreáigásaš rádjeavádatlohpi lea gustojeaddji eanemustá 5 jagi.
Lohpeeavttut
Rádjegozáhuslágádus sáhttá čáhkadit rádjeavádatlohpái rádjeortnega ja rádjedorvvolašvuođa doalaheami dáfus vealtameahttun eavttuid, mat gusket rádjeavádagas dáhpáhuvvi doaimma dahje johtima. Mii eat vuosttažettiin mieđit lobiid rádjeeanasneaidda dahje rádječázis johtimii.
Rádjeavádaga guoskevaš njuolggadusaid čuovvuma bearráigehččet Rádjegozáhuslágádus, Poliisa ja Duollu. Ane rádjeavádatlobi fárus, go jođát rádjeavádatguovllus. Čájet lobi bivddedettiin rádjegozáhusalbmái, poliisaalbmái dahje duolloalbmái.
Rádjegozáhuslágádus sáhttá du sávaldaga vuođul šluhttet lobi. Mii sáhttit maiddái šluhttet lobi, jus don dagat iežat áššálažžan rihkkosii, rihkkut lohpeeavttuid dahje avádatnjuolggadusaid.
Lassedieđuid addet gozáhusat.
Ruošša rádjeavádat
Oaččut dárbbu mielde dieđu Ruošša rádjeavádagas Ruošša ambassádas Suomas (helsinki.mid.ru).
Ruošša rádjeavádatlohpi ohccojuvvo skoviiguin, mat leat gávdnamis Ruošša Dorvvolašvuođabálvalusa Rádjegozáhusbálvalusa neahttasiidduin čujuhusas http://ps.fsb.ru/ Siiddut ja skovit leat ruoššagillii.
