Suoma riikkavuloža mátkkoštanáššegirjjit

Pássa

Suoma riikkavuložis galgá leat dábálaččat mielde pássa, go son vuolgá Suomas.

Eiseváldit eai dábálaččat dárkkis mátkkoštanáššegirjji, go jođát Schengen-riikkaid gaskka. Dus goittotge ferte leat mielde gustojeaddji juohke lahttoriikkas dohkkehuvvon mátkkoštanáššegirji dahjege pássa dahje ođđamállet persovdnakoarta.

Fuomáš, ahte fievrridanfitnodagat sáhttet goittotge dárkkistit mátkkoštanáššegirjjiin du personvuođa sisrádjajohtalusas. Sisrádjajohtalusain oaivvildit Schengen-riikkaid gaskasaš johtalusa.

Lassedieđu pássa birra ja dan mieđiheamis oaččut poliissa neahttasiidduin.

Persovdnakoarta

Jus leat Suoma riikkavuloš, sáhtát atnit mátkkoštanáššegirjin pássa sajis poliissa mieđihan govalaš persovdnakoartta dahje elektrovnnalaš persovdnakoartta, go mátkkoštat čuovvovaš riikkaide:
Hollánda, Belgia, Bulgária, Espánnja, Irlánda, Stuorra-Britannia, Itália, Nuortariika, Greika, Kroatia, Kypros, Látvia, Liechtenstein, Lietuva, Luxemburg, Malta, Portugal, Polska, Frankriika, Romania, Duiska, San Marino, Slovakia, Slovenia, Sveica, Čekkia, Ungár ja Estteeana.

Fuomáš, ahte sáhtát atnit persovdnakoarttat mátkkoštanáššegirjin dušše, jus du koarttas lea mátkkoštanvuoigatvuohta. Vuodjenkoarta ii leat persovdnakoarta.

Lassedieđuid mátkkoštanáššegirjin heivejeaddji persovdnakoarttas oaččut poliissa neahttasiidduin.

Sáhtát mátkkoštit Davviriikkaide almmá pássa dahje persovdnakoartta haga.

 

Davviriikka riikkavuloža mátkkoštanáššegirjjit

Davviriikkaid dahjege Suoma, Ruoŧa, Dánmárkku, Norgga ja Islándda riikkavuložiin lea pássafriddjavuohta. Dat dárkkuha, ahte Davviriikkaid riikkavuložat sáhttet johtit ja orodit Davviriikkain almmá mátkkoštanáššegirjji haga. 

Jus mátkkoštat Davviriikkaid riikkavuložin pássa dahje persovdnakoartta haga, don goittotge fertet sáhttit duođaštit identitehtat.

Dárkkis maiddái ovdamearkka dihte fievrridanfitnodagaid neahttasiidduin dárbbašlaš rávvagiid das, maid áššegirjjiid du geavahan fievrridanfitnodagat dohkkehit identitehta duođašteami várás.

Go mátkkoštat Davviriikkaid olggobealde Davviriikkaide dahje Davviriikkaid olggobeallai, dus ferte goittotge leat mielde pássa dahje eará dohkkehahtti mátkkoštanáššegirji.

 

EU- dahje Schengen-riikka riikkavuloža mátkkoštanáššegirjjit

Go boađát Supmii nuppi Schengen-riikkas dahje vuolggát Schengen-riikii, eiseválddit eai dábálaččat dárkkis du mátkkoštanáššegirjji. Dus goittotge ferte leat mielde gustojeaddji mátkkoštanáššegirji, dahjege pássa dahje persovdnakoarta.

Schengen-guvlui gullet čuovvovaš riikkat:

Hollánda, Belgia, Espánnja, Islánda, Itália, Nuortariika, Greika, Látvia, Liechtenstein, Lietuva, Luxemburg, Malta, Norga, Portugal, Polska, Frankriika, Ruoŧŧa, Duiska, Slovakia, Slovenia, Suopma, Sveica, Dánmárku, Čekkia, Ungár ja Estteeana.
 

Eará riikkaid riikkavuložat

Olgoriikalažžan dárbbašat pássa, go boađát Supmii. Dušše beare pássa lea doarvái, jus boađát Supmii visumfriddja riikkas. Muđuid dárbbašat pássa lassin visuma dahje orodanlobi.

Du mátkkoštanáššegirji galgá leat gustojeaddji unnimustá 3 mánotbaji dan maŋŋá, go vuolggát Suomas dahje Schengen-guovllus. Du pássa oažžu leat eanemustá 10 jagi dasto mieđihuvvon. Dát áigeráját eai goittoge guoska du, jus dus lea orodanlohpi Supmii. Dalle lea doarvái, ahte du pássa ja orodanlohpi leat gustojeaddjit.

Lassedieđut visumain leat oažžunláhkái Olgoministeriija siidduin.

Lassedieđut orodanlobiin leat oažžunláhkái Sisafárrendoaimmahagas.