Rádjagozáhuslágádus lea njunuš gádjunvirgeoapmahaš Suomas. Doaibmamet vuođđun lea mearragádjunláhka ja stáhtaráđi ásahus mearragádjumis. Dat geatnegahttet min fuolahit čuovvovaš doaimmain.
- Fuolahat gádjundoaimma plánemis, ovddideamis ja bearráigeahčus.
- Heivehat oktii mearragádjumii oassálastán virgeoapmahaččaid ja eaktodáhtolaččaid doaimma.
- Jođihat ja čađahat ohcan- ja gádjundoaimma.
- Vástidat várradillái laktásan rádiogulahallama dikšumis, ja telefongaskkustuvvon doavttirbálvalusaid čujuheamis fatnasiidda.
- Oassálastit várradiliid ovddalgihtii eastadeapmái.
- Vástidat mearrajohtima doarjjabálvalusain.
Vástidat COSPAS-SARSAT-vuogádagaiguin sáddejuvvon heahtedieđuid vuostáiváldimis ja sirdimis, ja vuogádagaide laktásan áššiid našuvnnalaš oktiiheiveheamis.
Addit mearragádjundoibmii laktásan jođiheaddjiskuvlejumi, ja dárbbu mielde earáge mearragádjundoibmii gullevaš skuvlejumi ja čuvgehusa.
Rádjagozáhuslágádusa lassin máŋggat earát virgeoapmahaččat leat geatnegasat oassálastit almmá buhtadusa haga mearragádjumii jus dilli dan gáibida. Dákkár virgeoapmahaččat leat Heahteguovddášlágádus, Dálkediehtaga lágádus, báikkálaš gádjunlágádusat, Johtalus- ja gulahallandoaimmahat, Fávledoaimmahat, boles, Bealuštanfámus, sosiála- ja dearvvašvuođavirgeoapmahaččat, Tuollu ja birasvirgeoapmahaččat.
Eaktodáhtolaš searvvit ja eará servošat oassálastet mearragádjundoibmii iežaset njuolggadusaid ja doaimmas mielde. Rádjegozáhuslágádus sáhttá addit eaktodáhtolaččaide doaimmaid. Eaktodáhtolaččaid ii goittotge sáhte ávkkástallat doaimmain, masa gullá fuopmášahtti almmolaš válddi geavaheapmi.
Lassin juohkehaš bargonávccalaš olmmoš, guhte orru várra- dahje lihkuhisvuođa lagašvuođas, lea dihto eavttuid dievadettiin geatnegas oassálastit doibmii mearragádjunjođiheaddji gohččumis. Maiddái mearraláhka geatnegahttá dárbbu mielde earáid lihkuhisvuođabáikkis lean fatnasii oassálastit ohcen- ja gádjundoibmii, jus dan sáhttá dahkat almmá lassevára dagakeahttá.
