Birasvahágiid duostun meara alde gáibida beaktilis duostunrusttegiid ja duostunmeannudemiid. Mii ovddidit ja hárjehallat jeavddalaččat guktuid daid geavaheami.
Oljoduostun meara alde oaivvilda čáhcái beassan oljju leavvama eastadeami, dan johtima stivrema, ja dan čoaggima rádjui. Duostuma galgá vuosttamužžan čađahit nu láhka go vejolaš vahágiid gáldu, dasgo dalle duostun lea beaktilamos ja vahágat uhcimusat. Beaktilamos lea, jos oljju dahje kemikála golgama fatnasis sáhttá eastadit dalánaga. Go olju beassá merrii dat dahká čázi ala gearddi, man gassodat lea sorjavaš oljju mearis ja kvalitehtas. Oassi oljo- ja kemikálakvalitehtain sáhttet mannat bodnái, báhcit čáhcegierraga ala, dahje lievllistit áibmui.
Oljju sáhttá čoaggit dahje jávkadit mearas golmma earálágan duostunmeannudemiin. Oljju sáhttá mollet kemiijalaččat dispersantain, dan sáhttá boaldit, dahje dan sáhttá čoaggit mekánalaččat earálágan bargoneavvuiguin. Suomas lea sohppojuvvon ahte geavahit dušše beare mekánalaš čoagginmeannudemiid.
Earálágan gustačoagginbiergasat leat dábálaš bargoneavvut oljju čoaggimii. Daid geavahit sihke stuorra fatnasiid sisa ráhkaduvvon vuogádahkan ja smávit rusttegiin maid sáhttá lihkahallat. Oljju čoaggima lassin lea dehálaš maiddái nagodit njoahcudit ja stivret dan leavvama. Ná duostundoaimmaide oažžu eanet áiggi, ja luondduárvvuid bealis árvvolaš čuozáhagaid sáhttá suodjalit. Dát dáhpáhuvvá bummaiguin. Mearas govdu bummain sáhttá ráhkadit juoba kilomehteriid guhkkosaš eastagiid. Guovtti fatnasa gaskii biddjojuvvon bummain sáhttá maiddái nuohttut oljju.
Girdingoziheamis lea dehálaš oassi oljoduostunoperašuvnnas. Váldooassi oljofeargga oljjus lea dan gasimus oasis, man lea váttis áicat johtti fatnasis meara gierraga alde. Gozihangirdinmašiinna sensorat ja oljju meari árvvoštallamii skuvlejuvvon fanasveahka nagodit earuhit gasimus dási, ja stivret duostuma dahkan fatnasiid rivttes sadjái.
Jiekŋadilit dahket oljoduostuma váddásun. Suopma lea ovttasbarggus eará riikkaiguin davvin ráhkadan oljoduostunmeannudemiid jiekŋadiliide. Rádjagozáhuslágádusa ja Mearrafámuid fatnasiidda leat ráhkaduvvon jiekŋadiliide heivvolaš čoagginrusttegat.
Suomas čuvvojuvvo prinsihpa, man mielde vahátdahkki buhtte duostumis boahtán goluid. Dat berrejuvvo vahága dagaheaddjis oajuid ja riikkaidgaskasaš foanddaid bokte. Jus vahága dagaheaddji báhcá eahpečielggasin, stáhta galgá buhttet goasttádusaid.
Kemikálavahága duostun lea mearkkašahtti olu váddásut go oljoduostun, dasgo soames kemikálat eai hábme meara gierragii gearddi man livččii vejolaš čoaggit. Kemikálat sáhttet maiddái reageret čáziin dahje eará kemikálaiguin. Mii ovddidat fanaskemikálavahágiid duostunávcca ovttasbarggus eará virgeoapmahaččaiguin, ja vuhtiiváldit dárbbu boahttevaš rusttetskáhppomiid bokte. Fanaskemikálalihkohisvuođas doaibman gáibida sierra teknihka ja skuvlejumi. Duostunfatnasiid galgá sáhttit badjel deaddagis, vai sáhttá doaibmat kemikálaváralaš guovllus. Fatnasat galget maiddái leat rustejuvvon kemikálačoaggindáŋkkain.
Mii gárvvistit Rádjagozáhuslágádusa ChemSAR-prošeavttas doaibmamálliid mearalaš kemikálalihkohisvuođaide, main galgá gádjut olbmuid kemikálaváralaš guovllus. Doaibmamálle lea eanaš oassái heivvolaš geavahussii maiddái fanaskemikálavahágiid duostumii.
Mearalaš birasvahágiid duostuma riggin leat stáhta oamastan máŋggadoaimmafatnasat. Juohke fatnas lea juohkebeaivválaš barggus, muhto dáidda lea lihkohisvuođaid várás stellejuvvon sisa ráhkaduvvon oljočoagginvuogádagat. Visot stáhta oamastan oljoduostunfatnasat sáhttet álggahit duostundoaimmaid ja čoaggit oljju iehčanasat.
Stuorimus čoagginnákca ja johtilamos reakšuvdnaáigi lea Rádjagozáhuslágádusa (3 stuhka) ja Mearrafámuid (3 stuhka) duostunfatnasiin. Lassin eará sajiin Suomas doibmet priváhta duostunfatnasat, mat bajásdollet oljoduostunválmmašvuođa Rádjagozáhuslágádusain dahkkojuvvon bálvalansoahpamušaid mielde. Ålándda eanangottestivrras lea okta oljoduostunfanas.
Johtilamosit duostunbargui oažžu Rádjagozáhuslágádusa fáktadámppaid, main váldoáššis guokte patrullerejit oppa áigge. Mearrafámuid duostunfatnasiin okta lea álo njealje diimmu vuolginválmmašvuođas.
Oljoduostunnávccalaš dámppaid lassin operašuvnnas sáhttá geavahit maiddái eará dámppaid ja fatnasiid. Daiguin sáhttá ovdamearkka dihtii opereret bummaid ja daid áŋkoriid, fievrridit bargoveaga, dárbbašlaš gálvvuid ja bázahusaid, ja vejolašvuođaid mielde čoaggit oljju čoagginvuogádagaiguin maid sáhttá sirdit. Rádjagozáhuslágádusa oamastusas lea mearkkašahtti mearri oljoduostumii dárbbašuvvon rusttegat, mat leat biddjojuvvon rájuide eará sajiide Suoma mearragátti.
Stuorra fanasoljovahágis Suopma sáhttá bivdit oljoduostunveahki maiddái ránnjáriikkain. Olles Nuortameara guovllus leat logit oljoduostunfatnasat. Nuortameara gádderiikkaid gaskasaš Helssega soahpamušas leat meroštallon prinsihpat, maid mielde veahki sáhttá bivdit ja addit. Johtilamosit duostunfatnasiid oažžu veahkkin ránnjáriikkain Ruoŧas dahje Estteeatnamis, go fas gozihangirdinmašiinnat olahit veahkkin johtilit maiddái mátta Nuortamearas.
Fanaskemikálalihkohisvuhtii heivvolaš fatnasiid mearri lea mearkkašahtti olu uhcit. Suomas leat 2 fatnasa (Rádjagozáhuslágádusa Turva ja Mearrafámuid Louhi), mat sáhttet doaibmat duostunbarggus jos dáhpáhuvvá fanaskemikálalihkohisvuohta. Fatnasat sáhttet doaibmat badjeldeaddagis várálaš guovllus, ja dat leat rustejuvvon kemikálačoaggindáŋkkain. Lassin Rádjagozáhuslágádusa fáktadámppat Tursas ja Uisko sáhttet doaibmat várálaš guovllus dihto ráddjehusain.
Birasvahágiidda oassálastán doaibmit galget sáhttit heivehit doaimmaidis bures oktii, vai resurssat ávkkástallojuvvojit beaktilit. Ovttalágán dillegovva lea ávkkálaš, go operašuvdna plánejuvvo ja ollašuhttojuvvo.
Suoma birasguovddáža hálddašan MERT lea oljovahágiid duostumii oassálastán virgeoapmahaččaid oktasaš dillegovvavuogádat. Jagis 2013 geavahussii váldojuvvon BORISa teknihkalaš geavahanáigi lea dievvamin. Heivehus ođasmahttojuvvo Rádjagozáhuslágádusa ja Suoma birasguovddáža ovttasbargun. Ođđa vuogádaga árvvoštallo leat geavahusas loahppajagis 2021. Viidásut iešvuođainis ođđa vuogádaga galggašii leat geavahusas geassit 2023.