Mii fállat bargguid rádje- ja mearragoziheddjiide, offisearaide, siviilaolbmuide ja sierraoffisearaide. Minguin beasat bargat eatnama ja meara alde ja áimmus. Go barggat Rájás, leat mielde dorvvasteamen nu olbmuid go mearrabirrasage eallima buot diliin.
Manin Rádjegozáhuslágádussii gánneha ohcat bargui?
- mii leat sihkkaris, luohtehahtti ja fidnomáhtolaš bargoaddi
- min barggut leat máŋggabealagat ja servodatlaččat mearkkašahttit
- min bargiin leat buorre vejolašvuođat gárggiidit ja ovdánit bargosis
- mii investeret bargoveahkamet skuvlemii
- du bargobirasin sáhttá leat ovdamearkka dihtii Lappi meahccebiras dahje áhpi.
Bargogovvádusat
Rádjegoziheaddjin sáhttá Suomas válbmanit dušše rádjegoziheddjiid vuođđokurssas Rádje- ja mearragozáhusskuvllas. Buohkaide geat čađahit kurssa dohkkehahtti árvosániin lea dihtosis sihkkaris bargosadji. Rádjegoziheaddji bargogovva lea máŋggabealat: Rádjegoziheaddjit barget ovdamearkka dihtii rádjegozáhusstašuvnnaid patrullajođiheaddjin, patrulla- ja gozáhusolbmán ja beanastivrejeaddjin. Rádjegoziheaddji dikšu rádjegozáhussii, olbmuid eatnamii boahtima ja vuolgima gozáhussii ja eará gozáhussii laktásan bargguid.
Rádjegoziheaddjit báhcet ealáhahkii juo 57-jahkásažžan. Rádjegozáhuslágádusas bálvalit sullii 1 700 rádje- ja mearragoziheaddji.
Mearragoziheaddjin sáhttá válbmanit dušše Rádje- ja mearragozáhusskuvllas. Mearragoziheaddji bargobáiki sáhttá leat ovdamearkka sihtii mearragozáhusstašuvdna, gozáhusskiipa, hámmana dahje girdingietti pássadárkkistanossodat dahje ovdagoddi. Oassi mearragoziheddjiin doibmet maiddái buokčin ja čázeoaigádjun. Mearragoziheaddji bargu sáhttá leat ovdamearkka dihtii fanaspatrulladoaibma mearraguovllus, deahkkaalbmá barggut gozáhusskiippas, pássadárkkisteapmi hámmanis dahje girdingiettis ja gohcin mearragozáhusstašuvnnas.
Mearragoziheaddjit báhcet ealáhahkii juo hui nuorran, dasgo bákkolaš earránanahki lea 57 jagi. Rádjegozáhuslágádusas bálvalit sullii 1 700 rádje- ja mearragoziheaddji.
Rádjegozáhuslágádusa offisearat skuvlejuvvojit Eatnanbealuštanallaskuvllas ovttas Bealuštanfámuid offisearaiguin. Offiseara ovdáneaddji bargui gullet máŋggabealat áššedovdi- ja ovdaolmmošbarggut organisašuvnna eará dásiin. Offisearat skáhppojit áššiid válmmaštallin ja áššedovdin dieđuid ja dáidduid, maid sii maŋŋeleappos atnet ávkin ovdaolmmošbargguin.
Dehálaš oassi offisearaid barggus lea operatiivvalaš beaivválaš doaibmamii oassálastin ja dan jođiheapmi. Go karrieara ovdána offisearat sirdašuvvet váddásut plánen- ja jođihanbargguide, main deattuhuvvo mearrediđolaš doaibman, máŋggabealat doaibmanbiras ja riikkaidgaskasaš ovttasbargu.
Rádjegozáhuslágádusa offisearat bálvalit soalddátvirggiin. Rádje- ja mearradorvvolašvuođa lassin bargui gullet maiddái militearalaš eatnanbealušteami barggut, maid offisearat hárjehallet Rádjegozáhuslágádusa jođihan geardduhanhárjehallamiin. Rádjegozáhuslágádusa offisearas gáibidit buorre psyhkalaš ja fysalaš veaju, fidnomáhtolašvuođa, ovttasbargonávccalašvuođa ja luohtehahttivuođa.
Rádjegozáhuslágádusas bálvalit sullii 650 offiseara earálágan áššedovdi-, skuvle- ja jođihanbargguin.
Gávnnat beassangáibádusaid ja ohcanrávvagiid Eatnanbealuštanallaskuvlla siidduin.
Mii fállat barggu maiddái siviilavirgeolbmáide ja universitehtahárjehalliide. Rádjegozáhuslágádusa ovdagottiin, fuolahusguovddážiin, jođihanbáikkiin ja gozáhusstašuvnnain barget sullii 400 siviilabargi. Siviilavirgeolbmát barget ovdamearkka dihtii áššedovdibargguin ekonomiija bealde, bargiidhálddahusas ja it-bargguin.
Sierraoffisearat Rádjegozáhuslágádusas barget sullii 40. Sii dikšot teknihkalaš suorggi bargguid ovdagottiin, divohagain ja gozáhusskiippain. Bargonamahusat sáhttet leat ovdamearkka dihtii doaimmahatinšenevra, mašiidnameašttir ja teleteknihkar. Sierraoffisearaid dearvvašvuođadillái ja fysalaš vedjui laktásan gáibádusat leat seammát go soalddátvirggiide. Sis lea maiddái vuoigatvuohta soalddátealáhahkii 57 jagi agis.
Mii váldit siviilavirgeolbmáid ja sierraoffisearaid Rádjegozáhuslágádusa bálvalussii nu ahte leat ožžon barggu čuvvon skuvlejumi. Dárbbu mielde addit sidjiide sierraskuvlejumi.
Gávnnat rabas bargosajiid valtiolle.fi.